Erntefest unger´e Akazien

Am 17. September wier´t wedder so wiet. Alle Joahre in September feiern wi in Luune Erntefest upp´n Pariser unger´e Akazien. Wi – dä Luunsche Heimatverein – hebb´n doatue wedder een Waan jeschmückt un upp´n Platz hebb´n Loawich´s Dieter un Andreas Thum Modelle von diä Luunsche Kirche, dät olle Spritzenschuur, dät Dröscherhuus un dät Dahm´sche-Huus – in Maßstab 1:44 – uutjestellt. Disse Modelle hebb´n een poar fleiß´je Luunsche Mannslüe bet in´t Detail in filijraner Oart un Wiese tohopejebastelt. Tum Biespell kunn dät orijinal Jlockenspell per Knoppdruck jelüüt werr´n. Bi´t Schmücken an Friedachaand hebb´n 12 bet 14 Lüe jehulpen. Diä Fruunslüe hebb´n diä Strüütze jebungen un diä Mannslüe hebb´n dän Waan uutjeputzt – ruckizucki wier´n wi doamet fettich. Melitta het för diä fleiß´jen Helper Kooke jebackt un Kaffee jekaakt.

An´n nächsten Dach is Wendt´s Bernte dänn met diä vulle Fuhre un sein Multicar to´n Festplatz jeführt. Üm klocke zwee jung dä Trott dänn los. Inne 30er Waan sin dörch´t janze Dörp jerollt – met´e Bürjermesterin vörwech. Veäle Lüe hebb´n öäre Hoffpoorten uutjeputzt. Et wier een jrooter Erfolch. Wi hebb´n jelacht, jewunk´n un ook´n bütschkin jesaap´n. Noa dän Umzuch hebb´n se upp´n Platz unger´e Akazien een hübschet Projramm jemaakt. Un diä ierschte Erntekönijin wurre unse Elke – se het sich jänge Jitta Blank dörchjeset´t. Bet in´n nächsten Morjen hebb´n diä Lüe jedänzt un jefeiert. Nu freun wi uns awedder upp´t nächste Joahr – wat för ´ne hübsche Tradition in Luune!

Geschrieben von Volker Tubandt.

[ngg_images source=“galleries“ container_ids=“8″ gallery_width=“600″ gallery_height=“400″ cycle_effect=“fade“ cycle_interval=“10″ show_thumbnail_link=“0″ thumbnail_link_text=“[Show thumbnails]“ order_by=“sortorder“ order_direction=“ASC“ returns=“included“ maximum_entity_count=“500″ display_type=“photocrati-nextgen_basic_slideshow“]